Maximilianus II. Serenissimo Principi Domino Henrico Duci Andegavensi Salutem
Serenissimo Principi Domino Henrico Duci Andegavensi, Electo Poloniae Regi etc. Consanguineo et Affini Nostro Charissimo Maximilianus II Divina favente clementia Electus Romanorum Imperator semper Augustus ac Germaniae, Hungariae, Bohemiae, Dalmatiae, Croatiae, Slavoniae etc. Rex, Archidux Austriae, Dux Burgundiae, Styriae, Carintiae, Carniolae et Virtembergae etc. Comes Tyrolis
Serenissimo Principi Domino Henrico Duci Andegavensi, Electo Poloniae Regi etc., Consanguineo et Affini nostro Charissimo salutem ac mutua benevolentiae continuum incrementum.
Serenissime Princeps, Consanguineo et Affinis Charissime. Non dubitamus Serenitatem Vestram iam antea ex nobili nostro et Imperii Sacri fidele dilecto Ludovico comite a Levenstain, domino in Scharffenegg, consiliario nostro, cognovisse ad futuros sub Serenitatis Vestrae per Germaniam transitum in Regni Franciæ limitibus caesares nos commissarios, qui Serenitatem Vestram per Sacri Romani Imperii ditiones ad fines usque Poloniae deducerent.
Cum igitur iam eidem comiti a Levenstain ac nobilibus nostris et Imperii Sacri fidelibus dilectis Ludovico a Seyn comiti in Wittenstein ac domino in Homburg consiliario nostro et Wolffango ab Eysenburg comiti in Budingen coniunctum vel divisum eius rei curam demandaverimus simulque nonnulla Serenitati Vestrae nostro nomine referenda commiserimus, uti ex ipsis coram intellectuae est.
Idcirco a Serenitate Vestra benevole postulamus, ut praefatos comites pro caesareis nostris commissariis agnoscere ac non modo his, quae nostris verbis dicturi sunt, plenam non secus ac si Nos ipsos loquentes audiret, fidem adhibere, verum etiam ea, quae promptis animis atque studiis praestituri sunt, officia grata habere velit.
Erit illud Serenitati Vestrae humanitatis ac in Nos mutuae benevolentiae dignum nostraeque expectationi consentaneum. Quod reliquum est, Serenitati Vestrae mutuae benevolentiae nostrae studia deferimus ac prosperum transitum rerumque omnium successum optamus.
Datum in civitate nostra Vienna die 19 septembris a. D. 1573, regnum nostrorum Romani et Hungarici undecimo, Bohemici vero 25.
Serenitatis Vestrae bonus affinis Maximilianus.